વોશિંગ્ટન/નવી દિલ્હી/ઇસ્લામાબાદ,
જમ્મુ-કાશ્મીરના પહલગામમાં પ્રવાસીઓ પર થયેલા આતંકવાદી હુમલા બાદ ભારત અને પાકિસ્તાન વચ્ચે તણાવ સતત વધી રહ્યો છે ત્યારે હવે અમેરિકાના રાજદ્વારી માર્કો રુબિયોએ ભારતીય વિદેશ મંત્રી એસ જયશંકર અને પાકિસ્તાનના વડાપ્રધાન શાહબાઝ શરીફ સાથે અલગ-અલગ વાતચીત કરી હતી.
આ બાબતે અમેરિકાના વિદેશ વિભાગના પ્રવક્તા ટેમી બ્રુસના જણાવ્યા અનુસાર, માર્કો રુબિયોએ ડૉ. એસ. જયશંકર સાથે વાત કરી અને હુમલા પર ઊંડી સંવેદના વ્યક્ત કરી અને પીડિતોના પરિવારો પ્રત્યે સંવેદના વ્યક્ત કરી. તેમણે આતંકવાદ સામેની વૈશ્વિક લડાઈમાં ભારત પ્રત્યે અમેરિકાની પ્રતિબદ્ધતાનો પુનરોચ્ચાર કર્યો. અમેરિકાએ ભારત અને પાકિસ્તાન બંનેને દક્ષિણ એશિયામાં તણાવ ઓછો કરવા અને શાંતિ જાળવવા માટે વાતચીત કરવાની અપીલ કરી છે.
બીજી તરફ, માર્કો રુબિયોએ શાહબાઝ શરીફ સાથે પણ પરિસ્થિતિ અંગે ચર્ચા કરી. પાકિસ્તાનના વડા પ્રધાન કાર્યાલય દ્વારા જારી કરાયેલી એક અખબારી યાદી અનુસાર, શાહબાઝ શરીફે અમેરિકાના વિદેશ મંત્રીને પ્રાદેશિક પરિસ્થિતિ પર પાકિસ્તાનના વલણ વિશે માહિતી આપી. વાતચીત દરમિયાન, શાહબાઝ શરીફે ભારત પર ઉશ્કેરણીનો આરોપ લગાવ્યો.
અમેરિકાના વિદેશ મંત્રીએ આતંકવાદ સામે ભારત સાથે સહયોગ કરવાની અમેરિકાની પ્રતિબદ્ધતાને “પુનઃપુષ્ટિ” આપી. તેમણે ભારતને દક્ષિણ એશિયામાં તણાવ ઓછો કરવા અને શાંતિ અને સુરક્ષા જાળવવા માટે પાકિસ્તાન સાથે કામ કરવા પણ પ્રોત્સાહિત કર્યા, એમ સ્ટેટ ડિપાર્ટમેન્ટના પ્રવક્તા ટેમી બ્રુસે જારી કરેલા એક નિવેદનમાં જણાવ્યું હતું.
